找回密碼
 立即註冊
搜索
熱搜: 活動 交友 discuz
查看: 279|回覆: 2

不打‧排名2016 (真打):港產片十大推介

[複製鏈接]

203

主題

0

好友

1208

積分

金牌會員

Rank: 6Rank: 6

發表於 2017-1-5 16:26:12 |顯示全部樓層
十大票房排名MPIA已經出左(詳見《2016香港電影票房十大》)
【寒戰II】($66,244,171)撼贏2012年神作【那些年,我們一起追的女孩】($61,857,826)
代表港產片重奪香港史上最高票房華語電影的一哥地位,意義重大!
雖然今年有兩套港產/合拍片入到票房十大 (【寒戰II】和【美人魚】)
叫做止住上年破天荒得一套【五個小孩的校長】入到十大嘅頹勢
但值得留意嘅係:
如果淨計十大港產/合拍片票房,會發現以往入得十大,最低嘅第十位,票房起碼都有千幾萬
由2012年千二萬【八星抱喜】到2013年千六萬【飛虎出征】到2014年千六萬【3D豪情】
到2015年千三萬【撒嬌女人最好命】再到今年第十位【S風暴】只有八百幾萬
而今年如果有港產/合拍片千三萬,已經入到頭五
証明港產/合拍片票房一直萎縮緊,而且客源歸邊只看最收得果幾套大片
情況其實好唔健康,值得業界警惕!

票房係客觀,評價則主觀
以下係小弟2016年真心推港產片十大推介:
(以電影上映日在2016年1月1日至12月31日內計算)

2016 十大推介 (港產片):

第10位:【少年滋味】
第一次有記錄片打入十大,值得大家支持!
張經緯前作【音樂人生】於第46屆金馬獎勇奪最佳紀錄片、最佳剪接及最佳音效
成為金馬獎史上獲獎最多的紀錄片,亦勇奪第29屆香港電影金像獎新晉導演
由佢親自執導拍9個不同年齡來自不同學校不同階層少年對生活對香港嘅感覺
而且冇避忌有講中港矛盾、新移民身份認同、雨傘運動等,本質上已經贏左!
不過對比張導前作【音樂人生】嘅感動,明顯呢套好「造」,少年們答得又好「正路」
所謂少年真實的一面,明顯只係佢哋願意畀大家睇嘅一面
睇開記錄片嘅觀眾自然feel到,呢套明顯拍俾道德能或怪獸家長或中產家庭圍爐取暖作品

第9位:【三人行】
我明改壞名,我明鍾漢良好趕客,我明結局好膠特技好差
我認!我係《不打排名2016影打》入面係插到呢套戲反轉
但插還插,淨係杜sir果朵都夠入十大啦!
一個醫院景拍晒,黑警劫匪醫生三人角力其實個頭開得幾好
尾場槍戰人肉slow motion長鏡頭技術係失手,但concept係有,拍得好係好看嘅!

第8位:【暗色天堂】
港產片好少夠膽拍宗教題材,而且仲係神職人員性侵犯事件,本心已經值得支持!
我寫過好多篇文講過,香港金像獎一直欠張學友一個最佳男主角
論輩份、論實力、論資歷,點都輪到佢
最諷刺係佢偏偏出道作【旺角卡門】就攞最佳男配角,之後足足等左27年都只係提名
而呢套又偷上計落2015年,偏偏撞上橫掃所有演員獎項嘅神作【踏血尋梅】
如果計返今年2016年,相信學友攞硬影帝!!!
講返套戲,改編自經典舞台劇【法吻】劇本自然紮實
學友和嘉欣果場吵大獲困獸戲,互數當年恩怨情仇情感推進細膩有層次貴為經典!
而學友演繹由上司到牧師、迷惑到迷失、自大到自責,拿掐得非常準確
可惜結局收得太急,唔係位置會高

第7位:【大手牽小手】
題材和風格太似【幸運是我】,都係講親情照顧腦退化症媽媽
但呢套冇走生活化平淡風格,反而走幾戲劇性嘅催淚路線
效果睇你受唔受,我見現場的確唔少女觀眾眼濕濕
我自己就覺得麻麻,我認為呢類温情文藝小品貴乎真誠、感動和共鳴
呢類推砌俾觀眾睇嘅戲劇情節應當可免則免
不過男主角黃浩然演得不温不火恰到好處,值得支持!
鮑姐當然更拿掐得好,睇黎今年金像女主角係佢同惠英紅之爭

第6位:【老笠】
講今年最驚喜,國語一定係【七月與安生】,港產片就一定係呢套【老笠】
咦!?乜兩套都關曾國祥事嘅!?今年似乎佢玩晒!!
導演係而家晚吹【真PK】好紅嘅火火,以往拍過一齣【等你愛我】爛爛地
估唔到拍出呢套一間7仔一晚多人一景你笠我我笠你嘅荒謬7仔挾持人質事件
而且拍出香港少有真心Cult片味道,結局先係驚喜,原來係一套100%嘅鬼片
攪咁大場龍鳳原來想講:而家香港做鬼都好過做人

第5位:【幸運是我】
從腦退化症切入刻劃親情平淡卻出色,介乎文藝片和劇情片之間
節奏控制得宜,有情懐、有感動、有輕鬆、有社會視野
不走催淚路線,反而生活化情節令人觸動
教觀眾珍惜眼前人之餘,亦學懂關懷和溝通,相信有照顧長者嘅人士相當有共鳴
編與導皆高出【大手牽小手】一班!

第4位:【寒戰 2】
我明白劇情其實好犯駁,我明白今集玩得太大收唔到科
不過以上情況第一集唔係都係咁嘅咩!?點解大家今集先識醒?!
坦白講,劇情犯駁大把荷里活A級製作都係咁,大家又唔會插囉
以戲論戲,文戲武唱人性角力政治口角keep到上集水準
而且畫面比上集拍得更靚更有味道,攝影及美術肯定係動作片黎講嘅最高
發哥嘅加入完全激活左成套戲,而且終於見返唔駛做下靶攪笑嘅發哥觀眾好感動
文詠珊亦演得出色,夠索夠搏
劇情其實講緊係King Maker而且仲係暗示中英政治博奕,香港要奮發自救
本心係值得鼓勵,只係寫到咁大,司法vs立法vs執法又選特首,handle唔到

第3位:【導火新聞線】
真心推!有情、有義、有故事!
由傳媒角力到直播室脅持再到一案兩審爭議
反思傳媒操守、控訴社會不公、批判政府不是
比起荷里活【華爾街綁架直撃】更有視野更有張力
台前幕後同一班底以電影成功再續HKTV經典同名神劇
比起TVB一拍電影版都有古天樂咩【使徒行者】【衝上雲宵】果類
只係消費緊一個品牌,當fans白痴賺到盡!
而呢套【導火新聞線】用心做,真心想延續一個品牌,值得支持!!!
P.S. 支持HKTV開台!佢d電視劇真心有heart做有料到!

第2位:【樹大招風】
由杜sir徒弟三位新晉導演許學文、歐文傑、黃偉傑合導
三位導演仲係分開拍,每人獨立拍一位賊王,再混剪成一套電影
神就神在,合得渾然天成,觀眾完全唔覺,相信剪接攞硬今年金像獎
更估唔到嘅係,青出於藍,三位拍出比杜sir更「杜琪風格」嘅作品
表面係講三大賊王,你當一般劇情片睇
其實回應緊杜sir經典宿命三部曲【暗花】【非常突然】【真心英雄】
探討既命題係:必然?抑或偶然?三大賊王係因為江湖傳聞而聚?還是因各自際遇而命定相遇?
到陳小春決意尋找兩人,偏偏事與願違困難重重,但只要堅持卻又會柳暗花明
其實回應緊杜sir經典【PTU】既黑色荒謬
而三人既抉擇,造就三人既結局,終歸因一個謠言,挑起各人既欲望和本性而自取滅亡
其實回應緊杜sir經典【大隻佬】既因果
多次強調既時間軸,回歸的前與後,想深一層又會發現
編劇刻意交代三大賊王面對回歸的不同取向
一個委曲順從卑躬屈膝、一個隱姓埋名依然故我、一個狂妄自大以下犯上
側寫香港人回歸後既不同出路和下場
其實回應緊杜sir經典【黑社會】既政治隱喻
而【樹大招風】既神,我覺得不在於電影既內容和意識
而在於港產片既本心!!我希望可以喚醒返杜sir,拍真‧港產片既初心!!

第1位:【點五步】

********* 發帖字數所限, 下文續************

Facebook專頁:港產不打
http://www.facebook.com/cheungsecond.fanpage
(支持我既請like我fanpage,些些)
**************************
港產不打
要救香港電影,首先票價要減!
**************************


港產不打
全職非牟利網絡打手
100%支持本地製作
乜戲都打,淨係唔打港產
回覆

使用道具 舉報

203

主題

0

好友

1208

積分

金牌會員

Rank: 6Rank: 6

發表於 2017-1-5 16:27:17 |顯示全部樓層
第1位:【點五步】
2013年創意香港「首部劇情電影計劃」大專組的勝出作品
二百萬成本又唔俾融資拍得出上到畫都已經值得支持!
何況導演明顯係想講政治,多過講棒球
青春片嘅元素:叛逆、義氣、汗水、友情、迷失、承諾、講粗口、嚐禁果、談未來等等全部都有
神就神在,導演成功將棒球賽和現今嘅政治局勢完美融合
無論係對話和自述、剪接和插敘、場面調度和蒙太奇,都互相補完,表裡歸一
做到港產片鮮有一個故事兩層意義,不露骨、不矯情,但卻做到觸動人心、熱血共鳴!
相對【危城】嘅避重就輕、【選老頂】嘅花生抽水、【江湖悲劇】嘅堅離地,明顯高出幾班!

而佢地想講嘅政治立場其實好有態度!
談的只是「本土精神」,但不代表就是被當今政壇騎劫了的「本土精神」
從來本土只代表土生土長的香港,冇話過代表「激進」「抗爭」甚至乎「勇武」
【點五步】宣揚嘅其實係一種新一代嘅香港人精神
唔係陳腔濫調、堅離地、要捱要忍呢類上一輩加諸俾後輩嘅所謂「獅子山精神」
而係要喚醒香港人,「不認輸、不放棄」嘅「本土精神」
自己前途,自己決定,你點揀都好,行左定行右,進定退都唔緊要
最重要係唔好逃避,唔好當冇事發生,唔好麻木視而不見
踏出「前途自決」嘅半步

新晉導演陳志發及編劇黃智揚係剛剛畢業嘅香港浸會大學電影學院畢業生
作為書院派第一套上畫嘅電影作品,完全唔覺係學生作品
無論係劇本、攝影、剪接都達到業界水準,意識和技術都完全成熟
足證港產片新生代,其實係有實力
而家拍來拍去都仲係果班食緊老本嘅老屎忽
演來演去都係果班演員
古天樂今年可以一個暑假檔期有五套電影作品
【三人行】【封神傳奇】【使徒行者】【危城】【S 風暴】
業界有冇真正反思過?港產片嘅衰落,其實係邊個做成?
青黃不接?定你地唔俾新人接?

備註:以上排名只建基於【一念無明】未上,如計落今年佢入硬十大!!
P.S. 【一念無明】為新晉導演黃進作品,曾志偉、余文樂、金燕玲主演
以劏房為背景去講一對複雜嘅父子關係帶出香港及人性種種問題
(今年3月先正式上映但佢已於上年偷上七場計左落2016年)
P.S. 今年金像獎新晉導演競爭相當激烈
【七月與安生】曾國祥vs【一念無明】黃進vs【點五步】陳志發vs【導火新聞線】方俊華
遺憾【樹大招風】許學文、歐文傑、黃偉傑因為合導冇得參選新晉導演
邊個選到都唔係重要,重要係未來港產片靠大家了!

Facebook專頁:港產不打
http://www.facebook.com/cheungsecond.fanpage
(支持我既請like我fanpage,些些)
**************************
港產不打
要救香港電影,首先票價要減!
**************************
港產不打
全職非牟利網絡打手
100%支持本地製作
乜戲都打,淨係唔打港產
回覆

使用道具 舉報

36

主題

0

好友

1萬

積分

論壇元老

Rank: 8Rank: 8

發表於 2017-1-9 14:46:12 |顯示全部樓層
書院派既導演更值得支持, 比起好多所謂幕後轉做導演個批好好多
回覆

使用道具 舉報

您需要登錄後才可以回帖 登錄 | 立即註冊

回頂部