找回密碼
 立即註冊
搜索
熱搜: 活動 交友 discuz
查看: 199|回覆: 1

【慳得一蚊得一蚊】​7大日常慳錢大法

[複製鏈接]

151

主題

0

好友

739

積分

高級會員

Rank: 4

發表於 2017-3-20 23:06:03 |顯示全部樓層


而家個個都話要慳錢買樓上車,一日三餐一係就自己煮,一係就捱麵包,星期六、日唔睇戲、唔shopping、唔食大餐,死慳死抵終於比到個首期。雖然每個人對買樓都有唔同嘅睇法,但打工仔平時返工都已經夠曬辛苦,何必仲要剝削自己娛樂的權利呢?其實慳錢唔一定要唔食唔飲嘅,喺日常生活裡面呢度慳少少,嗰度慳少少,一樣可以積少成多!

1. 記錄自己的消費金額
我地好多時之所以會洗大左,都係因為唔知道自己洗左幾多姐!養成記錄自己消費金額的習慣,記低自己食飯用左幾錢 ; 買衫用左幾錢。每日睇番自己用左幾多錢,發覺洗多左,自然就會有番節制,下次就唔敢咁大手筆喇!

2. 定下budget
細個讀書都有學啦!想慳錢就要減開支、增收入,咁先可以提高儲備架嘛!每個月定一個budget比自己,可以洗幾多,應該儲幾多,咁樣儲錢先有效率架嘛!冇洗過龍仲會別有一番成功感添!

3. 告訴家人、朋友你的慳錢大計
自己一個話要慳,通常都敵唔過自己嘅心魔嘅!所以,為左可以隨時有人喺你身邊督促住你,時刻提醒你唔好亂洗錢,最好嘅方法都係同曬所有屋企人同朋友講你嘅慳錢大計!咁無論去到邊,都會有人幫手喝住你,唔比你亂買野啦!

4. 免除非必要開支,例如買咖啡、食tea
打工仔得閒無事就鐘意去買杯咖啡、買啲零食,星期六、日就走去試新食店,其實呢度夾夾埋埋都好多錢架!如非必要,不如免除呢啲飲食娛樂的開支啦!唔嫌棄的話,其實即沖咖啡都OK啊!冇必要買成三、四十蚊杯咖啡啊!喺屋企食埋早餐先番工就仲慳皮添!零食方面,其實食咁多零食又唔係健康,口痕嘅話不如食下生果仲有益啦 !再唔係嘅就忍下口,留番個肚食dinner啦!至於星期六、日去試新野,又係咪真係必要呢?我都知香港人貪新鮮,不過食一餐又唔係平,慳啲錢,搵日食餐勁嘅,唔係仲好咩?

5. 建立儲硬幣習慣
雖然呢個方法就小朋友左啲,但積少成多呢個道理就幾時都冇錯嘅。見到銀包有個十蚊銀,不妨儲起佢,儲下儲下,真係有機會儲到成千銀架!

6. 購物要善用coupon和看準優惠期
平時收收埋埋咁多coupon,過曬期都唔記得用,嘥曬!Coupon呢家野都係小心啲放好啲!排好啲日期、分門別類,自然就可以充份使用啦!另外,必需品都可以趁優惠期掃多啲,長遠嚟計就慳好多啦!

7. 購物要看需要,不要貪平而買
一見有discount就毫無保留咁大買特買,點得架?凡事都唔好貪平而買,由其是經過啲十蚊店,一定要諗清楚嗰件物品係咪真係有用、有需要。另外,每次轉季都要買新衫,又嘥錢,又唔環保,都係唔好制喇!都係忍下手啦!

打工仔逢親月尾都呻窮,其實有時唔係洗大左,只係啲錢洗左落唔應該洗嘅地方姐!應洗則洗,依budget做人,洗完做番record,每星期檢視一次,慳錢就話咁易啦!

文:Noelle

更多打工仔分享,追蹤 ECjobsonline 專頁 或 瀏覽 www.ECjobsonline.com
回覆

使用道具 舉報

254

主題

0

好友

5350

積分

論壇元老

Rank: 8Rank: 8

發表於 2017-3-21 09:07:55 |顯示全部樓層
重有, (8)上班自己帶飯, (9)如果看中想買一件物品時, 第一次一定不買. 幾日後如果仍覺得那件物品有用而想買才去買. 但有可能因為要再出一次街但你不想出, 最後都無買.
回覆

使用道具 舉報

您需要登錄後才可以回帖 登錄 | 立即註冊

回頂部