找回密碼
 立即註冊
搜索
熱搜: 活動 交友 discuz
查看: 501|回覆: 3

不打‧排名2017 (影打)

[複製鏈接]

215

主題

0

好友

1280

積分

金牌會員

Rank: 6Rank: 6

發表於 2018-1-3 16:33:42 |顯示全部樓層
以下係小弟對2017年上畫電影另一個角度既詮釋,大家不妨交流一下 ^^
(以電影上映日在2017年1月1日至12月31日內計算,優先場不計)

印度片最大奇蹟:【打死不離3父女】
橫掃$2645萬破印度神作【作死不離3兄弟】印度片香港最高票房
印度良心Aamir Khan自資自監自演,真人真事改篇
從摔跤比賽切入講親情、講傳承、反封建、反歧視、倡女權
熱血感動賺人熱淚,最後場金牌對決拍得精彩
運動電影黎講絕對位列經典之一
印度本土票房更破盡紀錄,橫掃73億盧比,足足3億美金
但奇就奇在連中國都收得,橫掃12.99億人民幣

泰國片最大奇蹟:【出貓特攻隊】
橫掃$2427萬破泰國神作保持左17年的【人妖打排球】泰國片香港最高票房
出貓都可以拍到咁緊張刺激
場口唔多冇乜大場面下都拍到好有張力
劇情其實簡單直接但寫得峰迴路轉
人物角色塑造有血有肉
以學霸集團式出貓賺錢側寫出當今教育制度的扭曲
再諷刺社會的不公不義,最後再控訴人性道德尊嚴
具娛樂性亦具社會視野及人性批判
平衡做得好好,非常有驚喜

性價比最高:【一念無明】
首部劇情電影計劃大專組優勝作品,百幾萬製作,最終一千六百萬票房!
性價比最低:【星際特工瓦雷諾:千星之城】
洛•比桑蘊釀三年耗資兩億歐羅製作,最終全球票房慘淡僅收億幾美金!

最Cult:【香港大師】
香港碩果僅存特攝片唯一亦係第一製作班底G.V.A
網絡神作【關公大戰外星人】導演梁仲文
首次挑戰Cyber Punk風格,執導一套講未來科幻的古惑仔Cult片!
道具、佈景、燈光、美術撞出非常有味道、七八十年代對未來幻想的粗糙質感
而且向海量科幻名作致敬,夠RAW夠地,風格獨特

最為Cult而Cult:【女士復仇】
香港Quentin Tarantino導演火火前作【老笠】Cult得過癮驚喜萬分
可惜新作過左火位,胡鬧推砌,sell血sell女sell虐殺
好造作好浮誇!三條已經叫得中女又著晒膠衫!
總之睇得出用心去扮Cult,模仿Cult,致敬經典Cult片
但效果出黎就好似係國內山寨貨,只具其形,冇靈魂!冇精神!
連Cult片最基本特質:「估你唔到」,都做唔到
劇情白癡兒戲,重覆又重覆,醃悶到仆X!

最難明電影:【媽媽!】
入場前好難想像原來係福音電影,完全顛覆觀眾預期
唔事後睇官方解說,正常非基督徒/非天主教徒冇人知道做緊乜
間屋係子宮?訪客原來係亞當夏娃?爆水喉係比喻大洪水?BB仔就係耶穌?
短短兩粒鐘由舊約做到新約,濃縮人類歷史由創世做到末世
明白的不用說,不明白的說了也白說
我就瞓左!不過Jennifer Lawrence真心好戲,演技壓晒場!

最唔明電影:【天煞異降】
真正講科幻構想多過借科幻題材講打講殺
講嘅係「多向性時間概念」、從「語文系統改變思考模式」嘅理論出發
引申出女主角因為未來嘅果從而做到拯救地球嘅因
係一個打破因果,更甚去到看破因果嘅至高境界
其實好玄,亦可以好科學!
不過我唔明咩叫「圓形時間」,亦唔明點解我識得語言就可以有相關能力
識講,唔代表識做!識得咁去思考,唔代表我有相關技能!
我看唔透!
不過我好buy套戲類似史匹堡當年神作《第三類接觸》嘅精神續作
重點表述與外星文明溝通嘅過程,帶出共同理念:
外星黎到地球,唔係一定要侵略
高文明來到原始文明其實係進化嘅契機,其實似想借外星人勸導地球人
人類嘅進步需要團結,需要打破種族與言語的隔膜
呢套係值得觀眾深思嘅作品,我入佢係今年最佳科幻片!

集體回憶返晒黎作品:
第三名:【小丑回魂】
(保留原著神髓,還原經典場面,重塑恐怖片殿堂級小丑角色,本心充滿尊敬,演、導、編功力亦值得表揚!)
第二名:【海報師:阮大勇的插畫藝術】
(八十年代雄霸影壇電影海報設計師阮大勇老師的記錄片,而且仲有絕密手繪過程第一次公開!)
第一名:【美女與野獸】
(我重點全程望住Emma Watson,集體回憶返黎唔係【Beauty And The Beast】而係【Harry Potter】)

經典品牌成功重續:
第三名:【小男人週記3之吾家有喜】
(蛋哥配娜姐撞到火花,Do姐聲演加舊片段摳像重塑又做出笑中有淚效果)
第二名:【春嬌救志明】
(堅持港式粗口,對白地道,情節生活化有共鳴!同一對角色拍出第三個階段,實為香港當代兩性男女關係嘅標誌性作品!!)
第一名:【迷幻列車2】
(不再迷幻,純粹交代20年後角色的恩怨情仇,Fans反而好有驚喜!)

經典品牌成功摧毀:
第三名:【變形金剛:終極戰士】
(我忍得你腦殘,忍唔到你胡扯,你老美亞瑟王圓桌武士都俾你玩埋,下集你話孫悟空係變形金剛物仆X!?)
第二名:【盜墓迷城】
(成套戲明顯只係為左交代湯佬成魔經過,根本係超級英雄電影嘅套路同骨幹,完全傷透fans個心,湯佬年屆55仲要佢打有D力不從心!)
第一名:【Power Rangers:戰龍覺醒】
(世間上總有D電影擁有屌都廢柒事嘅屬性,劇情、設定、演技、動作場面、特技場面冇一樣野合格,Let it go吧!)

催眠度:
第三名:【沉默】
(馬田史高西斯醞釀28年作品,反思宗教的真正意義,由質疑基督到質疑宗教,再去到内心信念和表面行為嘅鬥爭,帶出福音電影的全新角度,不過真係好悶!)
第二名:【第一夫人:積琪蓮‧甘迺迪】
(無限無限無限齋Talk,訪問加過去插敘變一套戲,冇高潮起伏更甚連訪問對答把聲都冇高低起伏!)
第一名:【月亮喜歡藍】
(冇起承轉合冇高潮起伏冇劇情可言!童年少年中年,仲慢過侯孝賢!)

催淚度:
第三名:【明天,我要和昨天的妳約會】
(逆向時間,女生的明天其實是正常人的昨天,因此對男生來說第一次拖手,其實係女生的最後一次拖手,咁嘅設定下,最催淚原來係第一場戲,男生第一次邂逅女生,原來女生背住果刻已經忍唔到眼淚,因為對佢來說,呢日係佢見到男生的最後一天!係未好正?帶女朋友入場必喊之作!)
第二名:【再見亦是狗朋友】
(要喊除左愛情親情,往往仲有寵物情,人狗情未了當然好行,呢套破天荒講原來隻狗的意識和記憶係會不停投胎輪迴,今世蠟腸狗下世係雪橇如此類推,每次轉生都為新主人帶來唔同嘅人生改變,最後,人到中年的男主人終於因為一個動作認返隻狗,橫跨五十幾年的感情係未好touch先?寵物主人必喊之作!)
第一名:【玩轉極樂園】
(迪士尼藝高人膽大,將音樂夢想與家訓的矛盾,透過一段詭異的陰間歷險去教人唔好遺忘,人死要留名,親人要思念,將死亡拍得生動有趣,上一代嘅遺憾由呢一代去解決,淨係最後同太婆唱歌果幕已經爆晒洋蔥,sell親情sell得絲絲入扣,去到係人都會觸動嘅境界,神!)

堅離地度:
第三名:【合約男女】
(保險公司總裁愛上電單車送貨員,結局仲要玩降傘由郊區吹到去城市第一環?!)
第二名:【格雷的五十道色戒2】
(27歲型男億萬富豪仲要美國隊長咁嘅身形,可以真心鍾愛剛畢業嘅出版社助理編輯,為佢買左間出版社外,仲會跪地求原諒,仲會食埋佢好西,成個劇本完能全為左俾班OL打飛機自high)
第一名:【戰狼2】
(吳京一個打一兩萬人視作等閒,用舊彈弓床褥都可以接到火箭炮彈,國內票房高得驚人,平均戲票$55即係有一億人入戲院睇過,13個中國人就有1人入場,仲唔堅離地啦?!)

堅貼地度:
第三名:【春嬌救志明】
(堅持港式粗口,對白地道,情節生活化有共鳴,再玩埋八十年代集體回憶!)
第二名:【同囚】
(港產片少有爆大鑊作品,揭露懲教署少年犯勞教所不為人知嘅一面)
第一名:【一念無明】
(以精神病患者和情緒病患者的角度切入,從不正常的人看不正常的香港,帶出現今香港的種種問題)

********** 帖文字數有限,下篇回覆再續 **********

Facebook個人專頁:【港產不打】
http://www.facebook.com/fanpage.cheungsecond
(支持我既請like我fanpage,些些!)
**************************
港產不打
要救香港電影,首先票價要減!
**************************
影評歡迎收聽:最長壽科幻主題網台節目【Sci-Fi全面睇】
(逢星期一更新於網台「Ragazine」及「香港花生」)
聽眾歡迎加入FB group【Sci-Fi全面睇】
https://www.facebook.com/groups/339261276632/
同你報導科幻類型作品、電影、玩具、動漫、商品有關情報
不打排名2017影打.jpg

港產不打
全職非牟利網絡打手
100%支持本地製作
乜戲都打,淨係唔打港產
回覆

使用道具 舉報

215

主題

0

好友

1280

積分

金牌會員

Rank: 6Rank: 6

發表於 2018-1-3 16:34:20 |顯示全部樓層
甜度:
第三名:【小男人週記3之吾家有喜】
(F級鄧月平全場跳晒燈,娜姐床戰旦哥出奇地有d睇頭)
第二名:【女士復仇】
(娜姐、鄧麗欣、樂基兒大玩緊身衫及制服誘惑)
第一名:【沙灘拯救隊】
(加州大乳震Alexandra Daddario仲有Charlotte McKinney 和Kelly Rohrbach認真波濤洶湧!)

膠度:
第三名:【機器之血】
(成虫最後斷手重生,別人說佢似死侍,錯呀,佢係成隻前臂爆出黎,屌佢直頭係魔童啦!)
第二名:【俠盜聯盟】
(我相信劉德華嘅夢想係做到中國版嘅占士邦,不過每做一次,都係柒多次!三場主打盜寶戲設計非常粗糙求其,混入去又兒戲,偷果下又兒戲,走果下仲兒戲,最後都係駕車九衝街頭追逐,好能難抱認真心態睇落去,Budget係有,但用晒係歐洲拍外景拍古堡,不如用心度好故仔寫好劇本先啦)
第一名:【槑計劃】
(國產盜寶片,膠到個名冇香港人識讀,膠到所謂環綫敘事手法其實只係兩條故事線交錯,膠到永遠先拍結果再返拍過程重覆又重覆,膠到限韓令出台佢先拍好……但成套戲都有韓星)

最窩心:【柏靈頓2】
最虐心:【我想吃掉你的胰臟】
最契弟:【小男人週記3之吾家有喜】
最成功契弟:【大創業家】
最獨食:【我想吃掉你的胰臟】
最識食:【慾望鬱金香】
最唔識食:【格雷的五十道色戒2】
最偏食:【指甲刀人魔】
唔敢食黃鱔:【藥到命除】
唔敢食漢堡:【皇家特工:金圈子】
一個人殺好多人:【殺神 John Wick 2】
好多人殺一個人:【東方快車謀殺案】
自殺:【屍約】
自殺都冇事:【想死冇咁易】
切J:【失眠】
切J都冇事:【機器之血】
Google廣告:【漫漫回家路】
McDonald廣告:【大創業家】
最強長者:【盧根】
最強小朋友:【盧根】
最強家庭主婦:【Mrs. K】
最索醫生:【戀愛病發】
最索殭屍:【救殭清道夫】
最索救生員:【沙灘拯救隊】
最索時間穿梭者:【明天,我要和昨天的妳約會】

歌舞三寶:【52 Hz I Love You】【大娛樂家】【星聲夢裡人】
爆笑三寶:【未來外父插女婿】【西謊極落:太爆‧太子‧太空艙】【銀魂】
兒童三寶:【波士BB】【藍精靈:迷失的村莊】【柏靈頓2】
動物三寶:【街角遇見貓】【再見亦是狗朋友】【柏靈頓2】
愛情三寶:【編寫美好時光】【春嬌救志明】【星聲夢裡人】
逆權三寶:【我,不低頭】【大佛普拉斯】【逆權司機】
動作三寶:【惡女】【原子殺姬】【殺神 John Wick 2】
飛車三寶:【非常速盜】【寶貝神車手】【狂野時速8】
懸疑三寶:【東方快車謀殺案】【22年後之告白–我是殺人犯–】【目擊者】
扭橋三寶:【目擊者】【訪.嚇】【完美謊情】
驚慄三寶:【小丑回魂】【紅衣小女孩2】【報告老師!怪怪怪怪物!】
暗黑三寶:【失眠】【報告老師!怪怪怪怪物!】【目擊者】
時空三寶:【煙花,應該和誰看】【明天,我要和昨天的妳約會】【解憂雜貨店】
科幻三寶:【星球大戰:最後絕地武士】【人造天劫】【攻殼機動隊】
特攝三寶:【春嬌救志明】趷趷剛篇【美女變怪獸】【香港大師】

本地最趕客男星:成虫
(【絕地狂逃】【鐵道飛虎】【功夫瑜伽】【機器之血】全部垃圾!)
本地最趕客女星:鄭欣宜
(上年【iGirl夢情人】已經想走,今年【29+1】觀眾想嘔!)
外地最趕客男星:Johnny Depp【加勒比海盜:惡靈啟航】
(魔盜王系列從來我都狠評,全部角色都係白癡低能!佢嘅所謂怪雞演繹,從來都只係on 9弱智,十四年來重複又重複做足5次睇到膩晒,直頭精神折磨!)
外地最趕客女星:Kelly Marie Tran
(飾演【星球大戰:最後絕地武士】Rose,不解釋,他媽的!!)
一角最多人演:【月亮喜歡藍】(六人分演兩角,童年少年成年)
一人演最多角色:【思•裂】(Professor X一人分演24角,理論上係!)

最柒戲名:【7刻時空】(From 網友 Tony Tse)
最9唔搭8譯名:【煙花,應該和誰看】
(日本原名【打ち上げ花火、下から見るか?横から見るか?】,意譯應為:升起的煙火,應該從下面看?還是從側面看?)
兩岸三地最成功譯名:【Dangal】
(香港譯【打死不離3父女】、台灣譯【我和我的冠軍女兒】、中國譯【摔跤吧!爸爸】三個都精彩!)
撞名電影:【IT反監控】(I.T.)撞【小丑回魂】(It) (From 網友 Tony Tse)
借名電影:【佔‧誘神奇女俠】借【神奇女俠】名
借橋電影:【變形金剛:終極戰士】借【神劍亞瑟王】橋
一事兩拍:【恐襲波士頓馬拉松】【生命因妳更強】
一節兩拍:【C奶同學會2】【左兩爸右兩爸】
一景兩拍:九龍城寨【毒•誡】【追龍】
一橋兩食:【死亡無限LOOP】【7刻時空】
一橋多食:【詭娃安娜貝爾:造孽】與及James Wan監製或導演的所有恐怖片
戲中有戲:【編寫美好時光】入面有【鄧寇克大行動】

最多產男演員:蔡瀚億Babyjohn
(一年6套:【小男人週記3之吾家有喜】【救殭清道夫】【29+1】【拆彈專家】【明月幾時有】【西謊極落:太爆‧太子‧太空艙】)
最多產女演員:鄧麗欣Stephy
(一年4套:【失戀日】【空手道】【女士復仇】【藍天白雲】)
最多產導演:邱禮濤
(一年4套:【拆彈專家】【失眠】【原諒他77次】【常在你左右】)
最多產編劇:李敏
(一年4套:【拆彈專家】【失眠】【原諒他77次】【空手道】)

最勤力謝票:(唔知幾時開始港產片興起謝票,今年更發展到套套都謝,唔謝冇人睇嘅極端狀態)
第三名:【29+1】
(早三個月就上優先場,彭秀慧導演差唔多場場都有出現!)
第二名:【同囚】
(游學修谷到盡謝票,仲首創自己先買一張飛再post上網叫fans陪佢睇嘅主動式催票)
第一名:【今晚打喪屍】
(出晒更表導演及演員兵分幾路,謝票場密到一日十幾場,戲院密度最高油尖旺區及九龍灣當然去到盡,竟然連屯門巴倫紐都唔放過!堅勤力!)

最強女性:(全球女權主義抬頭,電影女性主導乃大勢所趨,今年特別新增呢項響應潮流)
第四名:【原子殺姬】Charlize Theron
(42歲仲好揪得,今套打得好實!打得好地!打到爆晒缸!夠cool夠型夠搏命!)
第三名:【惡女】金玉彬
(【屍殺列車】班底打造韓國第一動作片,一shot到底POV主觀視點長鏡頭玩左兩場打足半個鐘,一個殺百幾個非常精彩!)
第二名:【攻殼機動隊】Scarlett Johansson
(最強人類女性黑寡婦踩過界演埋人造人草薙素子,虛實兩邊都玩晒,冇得輸!)
第一名:【神奇女俠】Gal Gadot
(Wonder Woman角色獲得全球認同!肯定係全球女性最打得角色!)

最難忘電影對白:【29+1】
欣宜對Babyjohn說:「不如我地,做愛囉。」

Facebook個人專頁:【港產不打】
http://www.facebook.com/fanpage.cheungsecond
(支持我既請like我fanpage,些些!)
**************************
港產不打
要救香港電影,首先票價要減!
**************************
影評歡迎收聽:最長壽科幻主題網台節目【Sci-Fi全面睇】
(逢星期一更新於網台「Ragazine」及「香港花生」)
聽眾歡迎加入FB group【Sci-Fi全面睇】
https://www.facebook.com/groups/339261276632/
同你報導科幻類型作品、電影、玩具、動漫、商品有關情報
港產不打
全職非牟利網絡打手
100%支持本地製作
乜戲都打,淨係唔打港產
回覆

使用道具 舉報

41

主題

0

好友

1萬

積分

論壇元老

Rank: 8Rank: 8

發表於 2018-1-12 11:48:26 |顯示全部樓層
嘩, 你掃哂啲片喎, 甘拜下風, 唔夠你講了
回覆

使用道具 舉報

215

主題

0

好友

1280

積分

金牌會員

Rank: 6Rank: 6

發表於 7 天前 |顯示全部樓層
我今年原來睇左204套電影
自己都嚇一跳
港產不打
全職非牟利網絡打手
100%支持本地製作
乜戲都打,淨係唔打港產
回覆

使用道具 舉報

您需要登錄後才可以回帖 登錄 | 立即註冊

回頂部