找回密碼
 立即註冊
搜索
熱搜: 活動 交友 discuz
查看: 1232|回覆: 2

不打‧排名2017 (正打):外語片十大推介

[複製鏈接]

215

主題

0

好友

1280

積分

金牌會員

Rank: 6Rank: 6

發表於 2018-1-21 13:34:33 |顯示全部樓層
香港票房有限公司(香港影業協會及香港戲院商會屬下機構)公佈2017非香港電影票房十大:
第10位【盧根】$38,540,970
第9位【星球大戰:最後絕地武士】$41,566,597 (上映中)
第8位【波士BB】$41,766,789
第7位【正義聯盟】$43,595,226 (上映中)
第6位【狂野時速8】$47,586,551
第5位【神奇女俠】$47,781,122
第4位【壞蛋獎門人3】$49,892,324
第3位【雷神奇俠3:諸神黃昏】$51,521,085 (上映中)
第2位【蜘蛛俠:強勢回歸】$65,760,306
第1位【美女與野獸】$67,232,157
大家睇到D咩?
就算唔係全部腦殘,都肯定全部爆谷!
娛樂至上,就係香港觀眾的選擇!
5套超級英雄,2套動畫,2套系列續作,1套真人版Reboot
証明超級英雄仍然深受觀眾歡迎
以往清一色Marvel,今年終於有DC作品
而且入兩套,仲係第一套超級女英雄電影
DC終於走前Marvel一小步
合家歡作品仍然穩佔市場,不過動畫今年似乎弱左少少
【玩轉極樂園】全球只有香港12月28日先上
遲足墨西哥兩個月、美國中國一個月
如果唔係咁遲相信入硬十大冇懸念!
另外,冷不防今年竟然繼【死侍】之後再有三級片入圍
而且【盧根】其實唔係惡攪粗口咁簡單,真心暴力真心dark
估唔到真•三級片都入到十大!
不過十大入面睇真D,只有【波士BB】係唯一原創
代表D咩?証明荷里活都係食老本
收得嘅拍完又拍無限reboot
其實同八十年代香港電影有咩分別?!
致香港觀眾:
娛樂至上唔係唔好,但唔應該係唯一入場原因
電影除左係娛樂,其實都可以有唔同面向

票房係客觀,評價則主觀
以下係小弟2017年真心推外語片十大推介:
(以電影正式上映日在2017年1月1日至12月31日內計算,優先場不計)
(動畫電影不計算在內,將另列動畫十大排名)

2017 十大推介 (外語片)

第10位:【英倫對決】( The Foreigner )
成虫第二套令我刮目相看作品
第一套係國產片,2013年丁晟執導的【公安故事2013】
兩套嘅共通點都係,成虫真心只做演員
導演另有其人,而且有能力抗衡成虫的控制及污染
呢套導演Martin Campbell 年屆73歲
講輩份仲高過成虫一輩,當佢微塵
雖然導演前作就係超級英雄電影黎講公認最差最爛嘅【綠燈俠】
但人地之前拍過【新鐵金剛之金眼睛】【新鐵金剛智破皇家賭場】
都係成功開拓出007系列的新階段、新方向
仲有套2000年講攀山的【終極天險】正到爆裂
証明佢唔係冇料到,只係唔識拍超級英雄電影
今套一樣,佢完全駕馭到成虫之餘
亦有適當俾時間俾空間發揮佢嘅身手
而且情節鋪排合理,動作打鬥點到即止
唔拖唔誇張唔賣弄,而且打得濃縮精彩
加上塑造佢誓要還亡女一個公道
鍥而不捨預左隨時犧牲的執念
單人匹馬玉石俱焚以死相逼
拍得精準,佢亦演得夠實唔過火!
採用雙雄對決式套路,一文一武對奕
Pierce Brendan Brosnan演活被夾於愛爾蘭和英國之間
與恐怖份子和英國秘密情報局的周旋角力
互相試探、隱瞞、誤導、遊說、脅逼、檯底交易
政治角力比武鬥更加精彩!

第9位:【出貓特攻隊】( Bad Genius )
出貓都可以拍到咁緊張刺激
場口唔多冇乜大場面下都拍到好有張力
劇情其實簡單直接但寫得峰迴路轉
人物角色塑造有血有肉
女主角聰明到盡,幫人出貓可以集團式經營賺到盤滿缽滿
男主角戇直到盡,由堅持到猶豫到屈服到背叛再到同流合污
觀眾睇住佢價值觀逐漸崩潰再被扭曲
睇住佢壞,睇住佢入魔
和女主角正正形成強烈對比
對出貓呢個議題做出正反論証嘅戲劇效果
相當精彩
橫掃$2427萬破泰國神作保持左17年的【人妖打排球】泰國片香港最高票房記錄
實至名歸!

第8位:【星聲夢裡人】( La La Land )
歌聲悅耳,衣著華麗,舞步明快,配樂輕鬆
歌詞更加精雕細琢,喜歡爵士樂嘅朋友更加一定要入場
當然要有睇歌舞片嘅心理準備,但呢套起碼唔係純歌舞
起碼角色都有正常對白較易入囗
不過唔好期望係史詩式蕩氣迴腸愛情大片格局
反而係走生活化小品路線
善用長鏡頭,淨係頭場塞車公路大合唱已經值回票價
Magic moment、L.A.遠景、一盞街燈一張長櫈下
一鏡到底雙人歌舞調情一幕,更成經典場面之一
不是大團圓的結局往往更有感染力
加入「如果……當初」的遺憾元素
將兩人關係昇華,讓觀眾無限FF
令結局更有味道!
雖然挾住橫掃金球獎七大奬項與及平【Titanic】紀錄獲14項奧斯卡金像提名之勢
可惜最終攞左上手嘅最佳電影都係頒錯
Anyway 【星聲夢裡人】的而且確將歌舞片活化
做到呢十年都冇咩人做到,將歌舞片重塑注入新元素
並將歌舞片帶到新一代,甚至乎全世界
其實有佢歷史的意義及對業界的貢獻!

第7位:【恐襲波士頓馬拉松】( Patriots Day )
同一歷史事件「波士頓馬拉松恐襲」,相同題材
少有同一年拍成兩套電影但又完全唔同面向,冇鬧雙胞
一套如實表述恐襲及緝凶經過,一套聚焦斷腳生還者的心路歷程
只係對手太強,【生命因你更強】差少少入埋十大

套戲拍得真實,還原幾幕重要場囗
導演想將套戲串連返現實,更加插真實當事人的訪問
冇將角色英雄化,亦冇將恐怖份子邪惡化
緊守客觀表述,係劇情片和記錄片之間取得絶妙平衡
由調查總部、地區警方及凶徒三線鋪述
層層有敘,線線緊扣,幾幕場口拍得出色
果場街頭槍戰雖然冇堅持一shot到底,但也充分利用長鏡頭及POV交替表述過程
裏外穿插,再加步移式拍法,寫實感爆曬燈
仿記錄片拍法功力爐火純青,絶對值得作為教學記範之用

結局最正!!係真•記錄片
由現實人物代替戲內角色講返電影主旨及信念
用長跑的堅毅表達反恐的堅定不移、受害者的自強不息和波士頓的國民團結
取斷腳夫妻三年後再次參賽最後衝線的一刻為end shot
係好touch亦最有説服力,神來之筆,令人難忘!

第6位:【奇蹟男孩】( Wonder )
講述一對父母如何努力幫助兒子克服他那畸形的臉所帶來的歧視及欺凌
係一般逆境自強的主旋律勵志電影下,撞出笑中有淚的效果
天生臉相畸形的男孩,原來才是電影裡最幽默的一個
最觸動的,唔係男主角,反而是他的身邊人
突破以佢為主線的傳統套路,故事中段反而分篇以其他角色出發
從姐姐、姐姐的閨蜜、第一位學校結交的朋友、同樣被欺凌的同學、父母為視點
側寫返主角的成長和堅強,角度及敘事手法幾新
其實主角一直我行我素,自量亦自強
反而佢嘅存在,不知不覺改變緊身邊人,呢下先最感人!

童星Jacob Tremblay演技冇得輸
不過演佢家姐嘅Izabela Vidovic最有驚喜!

男孩天生異相,自然受盡父母的關愛
其實最痛苦的,除了男孩,還有他的姐姐
自少被忽略、被標籤、被世人認定要照顧弟弟
生於呢個家庭,連撒嬌都不能,自少要學懂照顧自己
起碼唔可以再製造麻煩給父母
呢個咁矛盾嘅角色,對細佬又愛又恨
佢拿掐得好好,親和力夠!
比主角更獲得觀眾同情!

第5位:【天賦的禮物】( Gifted )
美國隊長Chris Evans終於擺脫美國隊長的定型
脫胎換骨演出連班主任都夠膽食嘅不良舅父
受早逝家姐的臨終托孤,焗住照顧佢個女的情況下
跑出富貴外婆,演變成不肖子vs媽媽對簿公堂爭撫養權
誰不知竟扭出家姐對怪獸家長的終極報復
最後譜出一段非典型的父女關係,令舅父重拾人生
單看劇情係估佢唔到
最精彩係加入資優兒童及數學天才的元素
令表明sell親情的類型片變成幾破格的倫理劇
大有當年【驕陽似我】的味道

Mckenna Grace飾演數學天才女主角
和舅父的三離三合,情感推演有層次有角度
怪獸外婆Lindsay Duncan同樣精彩
演技壓場,亦令到咁平淡嘅劇情充滿逼力

天賦的禮物,唔係講血緣,而係講血濃於水嘅親情
其實仲側寫緊美國的兩代矛盾、新生代的出路
下一代要活得精英優越?還是要活得快樂自在?

********** 發文字數有限,以下回帖再續 **********

Facebook個人專頁:【港產不打】
http://www.facebook.com/fanpage.cheungsecond
(支持我既請like我fanpage,些些!)
**************************
港產不打
要救香港電影,首先票價要減!
**************************
影評歡迎收聽:最長壽科幻主題網台節目【Sci-Fi全面睇】
(逢星期一更新於網台「Ragazine」及「香港花生」)
聽眾歡迎加入FB group【Sci-Fi全面睇】
同你報導科幻類型作品、電影、玩具、動漫、商品有關情報
2017正打外語十大.jpg

港產不打
全職非牟利網絡打手
100%支持本地製作
乜戲都打,淨係唔打港產
回覆

使用道具 舉報

215

主題

0

好友

1280

積分

金牌會員

Rank: 6Rank: 6

發表於 2018-1-21 13:35:21 |顯示全部樓層
第4位:【槍狂帝國】( Miss Sloane )
屬於女主角Jessica Chastain一人show電影
無論演技、囗才、智謀、外型、霸氣都絶壓全場
角色刻劃鮮明,形象夠辛辣又有性格!
塑造出美國說客真實而專業嘅形象
為求目的不擇手段嘅極致,原來係自我犯罪
無間道、人生攻擊、出賣朋友、威逼利誘、互揭黑材料等等無所不用其技
計謀一步計一步,圏套一層套一層
匹敵水鏡八奇嘅智慧,以小勝大逆轉勝觀眾睇得精彩!!
描述辯論過程過癮又有層次
強詞奪理、偷換概念、訴諸權威、階段再定義
其實係Critical Thinking嘅promotion video
玩疊聲勁過【寒戰】,玩政治勁過【選舉偽術師】
思辯能力強過【時代偽證者】,法庭戲感染力強過【逆權大狀】
一分鐘可以二三十句對白連珠爆發!
文戲拍出張力,對白咄咄逼人
文戲武唱嘅試範作,位列經典!
將法庭戲升華到奇謀制勝式鬥智片
而且充分表述到槍械管制的利與弊
教你如何用一套電影宣傳政治立場

美國表面民主、自由、平等、公正
但實際政界和商界關係千絲萬縷
商界之中又以軍火商權傾一方
你拍套戲屌人、屌事、屌政黨乜都得
但拍套戲要槍械管制斷人米路就老虎都唔得!
美國電影業界根本冇人夠膽得罪軍火商
套戲由頭到尾都受盡冷淡對待
排唔到期只能作少數發行有限上映
Jessica Chastain演技肯定技壓Emma Stone
可惜佢連金像最佳女主角提名都冇
正確D黎講,套戲係一個金像提名都冇,公平咩!?
觀眾眼睛係雪亮嘅
呢套戲係神定係沉,歷史自有公論!

第3位:【打死不離3父女】( Dangal )
橫掃$2645萬破印度神作【作死不離3兄弟】印度片香港最高票房
印度良心Aamir Khan自資自監自演
淨係佢增肥到【黑馬王子】肥豬王咁嘅身形,演老年肥爸教練
之後操到【激戰】張家輝咁嘅身形,去演少年時的摔跤冠軍
已經拍爛手掌!
難得飾演兩個女的同樣精彩,運動員黎講顏值算高樣子算討好
演技淋漓盡致之餘,摔跤技術更加入型入格
全套戲真心贏左呢三位父女嘅互動

印度史上第一位英聯邦運動會女子摔跤冠軍Mahavir Singh Phogat
真人真事改篇,從摔跤比賽切入講親情、講傳承
塑造一段怪獸爸爸女生男養望女成龍
將自己未圓嘅夢想強加諸女兒身上的扭曲故事
但三父女的感情描寫細膩,矛盾位衝突位精彩
大女的迷失及二女的堅持,父親的鍥而不捨
的確熱血感動,賺人熱淚!
再加入女權元素,反封建、反歧視
有批判社會的視野
當然劇情上加入好多戲劇性情節
例如魔鬼教練及最後金牌對決的五分逆轉勝等
但事實係兼顧到真人真事的寫實感和運動電影的熱血
拍得精彩,拍得感人
「印度冠軍,每年都有一個,唯獨代表印度出戰國際賽事而奪冠,先係真正的第一」
運動電影黎講,絕對位列經典之一
P.S. 印度片通常有多場大型歌舞,唔跳唔算大片,但呢套破格地冇,睇得出導演有信心及夠薑之外,亦嘗試將印度片真正面向國際,唔再孤芳自賞,事實證明印度本土及國外票房都好好,相信為印度片未來奠下重要基石和方向!

第2位:【鄧寇克大行動】( Dunkirk )
基斯杜化路蘭首次執導戰爭電影
堅持用菲林拍攝,而且仲係iMax 70mm菲林
繼【星際啟示錄】後再一次冇華麗特技下
用熟練而最raw嘅電影語言:鏡頭、剪接、配樂
發揮到淋漓盡致,完全冇包袱,冇妥協
100%用返自己風格,招牌人性刻劃
呈現出一種介乎記錄片及劇情片之間嘅質感
我定義為「路蘭質感」!!
導演功力爐火純青,絕對係今年橫掃金像獎大熱之作

今套使用非線性混剪手法
從海、陸、空三個角度、三段時間、三條故事線完美融合
由近鏡到遠鏡,由交代結果到表述過程、由主觀視點到客觀描述
裡裡外外穿插,遠近快慢交替,表述出人類史上最成功的一次撤軍行動
兼具重現歴史的視野及戲劇張力的營造
一個救人,一個犧牲,一個被救
船長一角刻劃市民的堅持,歌頒他們甘願冒險出海營救的偉大
萬里浩瀚戰機穿梭對戰
交代三個空軍英雄默默守護海面部隊隨時犧牲,刻劃出捨身成仁的情操
一個渴望回家掙扎求存甚至乎出術打尖上船的小兵
以被救者的角度表述電影主題
一次又一次的死裡逃生,充分表達出當時軍人面對戰爭的無力感
戰場變幻,所有野都冇從掌握
生命無常,呢一刻被救,下一秒可以全艦淹沒

導演雖然強調戰場上生命無從掌握
但卻同時帶出命運可以自決的道理
戲入面所有主要角色的行為
包括船長、中校、男主角、法國兵、二等兵、兩個機師等等
電影好強調佢地係關鍵時刻的自我抉擇
堅持自己的原則和信念
最後未必完勝但必定走向最好的結果
「戰場上能夠平安回家的,才是勝利」
的確發人深省

全套戲見唔到任何一個德軍
(最後挾機師果幾個唔算啦)
最多只見到幾架德軍戰鬥機的情況下
偏偏拍出戰爭的真實感及九死一生的震撼
冇大型戰爭場面下
簡簡單單一個魚雷幾槍幾十個炸彈
成套戲張力已經澎湃,牽住觀眾情縮
冇煽情冇催淚冇犧牲的情況下
真正做到以靜制動,細水長流的深刻
絕對係戰爭電影的另一種詮釋
如果反戰經典是【現代啟示錄】拯救經典是【雷霆救兵】
呢套肯定係撤軍經典,位列同級!

第1位:【完美謊情】( Perfect Strangers )
久違了的多人一景電影
成套戲只係拍一晚飯局
三對夫妻/情侶與及一位單身肥佬
食飯時有人貪玩提議大家公開手機
當晚無論收到咩短訊、咩whatsapp、接到咩電話都必須公開
慢慢演變成各人互相猜疑、爾虞我詐、互穿對方秘密、互揭對方瘡疤
逐步揭開每人不為人知的過去、糾纏不清錯綜複雜的關係
最後人人失控,關係瞬間破裂崩潰!

大橋其實一字咁淺,但對白度得天衣無縫
勾劃出角色性格及背景之外,更引申角色表與裡的不同
邊個講大話?邊個詐傻扮懵?邊個想試探?邊個其實想保護對方?
我叫雞、你出軌、我報復、你偷食、小三係我、前度係佢
我當你知己?!你當我臭四?!
總之友情紙咁薄,觀眾越睇越心寒
每一個角色都有隱藏,每一個角色都有說謊
將千絲萬縷的關係好戲劇性地置係飯局入面慢慢升溫!逐步瓦解!
劍拔弩張,文戲武唱!
對白精簡,張力澎湃!
肯定係編劇教材之一
角色穿線互動的示範經典!

七人之中,其實邊個先係真愛?
我睇完同老婆傾左成個鐘
絕對有助夫妻/情侶增進瞭解感情昇華
我就話只有兩個

當然套戲除左寫當代男女關係外
亦直接控訴智能手機及社交程式對當代男女關係的扭曲
人嘅關係究竟真係近左?定假左?
方便溝通?定方便偷食?
更有一幕幾絕核的笑位,將男女比喻為Apple及Android
算係有D黑色幽默
其實呢套係意大利電影,係有別於荷里活風格
由資深導演Paolo Genovese自編自導
佢拍攝過百廣告亦獲獎無數後
2002年自組電影製作公司,至今開拍十套作品
平均一年一套,非常積極
佢一直都拍開主流商業的都市喜劇及男女題材
你可以理解為意大利葉念琛
估唔到呢套一改風格,就橫掃歐洲影壇
先後獲得「David di Donatello」最佳劇本、最佳電影
「Bari International Film Festival」最佳劇本
「Tribeca Film Festival」最佳劇本
「Vilnius International Film Festival」觀眾最愛電影
叫好叫座!
反之,我地嘅葉念琛
就只有不停重複自以為是的成功模式
一直係井底之蛙而不自知
天淵之別!

結局的平行世界,其實好有味道
人人都有面具,人人都有秘密
知得更多,未必讓你活得更好
世上沒有完美情人
只有陌生人,才是最完美!

P.S. 【完美謊情】載譽回歸1月26日MCL康怡重映一場,未看要看!!

Facebook個人專頁:【港產不打】
http://www.facebook.com/fanpage.cheungsecond
(支持我既請like我fanpage,些些!)
**************************
港產不打
要救香港電影,首先票價要減!
**************************
影評歡迎收聽:最長壽科幻主題網台節目【Sci-Fi全面睇】
(逢星期一更新於網台「Ragazine」及「香港花生」)
聽眾歡迎加入FB group【Sci-Fi全面睇】
https://www.facebook.com/groups/339261276632/
同你報導科幻類型作品、電影、玩具、動漫、商品有關情報
港產不打
全職非牟利網絡打手
100%支持本地製作
乜戲都打,淨係唔打港產
回覆

使用道具 舉報

41

主題

0

好友

1萬

積分

論壇元老

Rank: 8Rank: 8

發表於 2018-1-29 14:05:14 |顯示全部樓層
睇星際啓示錄就覺得Jessica Chastain好正
回覆

使用道具 舉報

您需要登錄後才可以回帖 登錄 | 立即註冊

回頂部