找回密碼
 立即註冊
搜索
熱搜: 活動 交友 discuz
查看: 2005|回覆: 2

不打‧排名2017 (真打):十大伏片

[複製鏈接]

218

主題

0

好友

1299

積分

金牌會員

Rank: 6Rank: 6

發表於 2018-2-24 18:56:47 |顯示全部樓層
伏,藏也,有潛藏及埋伏嘅意思。
中伏,指誤踩陷阱,誤中敵方埋伏。
伏片,指電影表面形象與實際質素完全不符,嚴重脫離觀眾預期。

爛片,係套戲本身質素差!
伏片,係套戲嘅質素同觀眾預期有極大落差!!
爛,並唔等於伏!爛片,亦唔一定係伏片!
因為好多電影牌面已經表明係爛,仲要入場嘅觀眾某程度上係預左睇下點爛!
例子:【賭城風雲III】【偷天特務】,你預左蝗晶係拍呢D質素啦
但伏片唔同,係未入場前冇人估到係爛片
通常因為是系列續作或外傳,又或是大卡士大製作
但睇完先發覺原來他媽的爛!
電影質素明顯和觀眾的expectation有significant嘅落差
甚至有即場係戲院報警、報海關、向消委會投訴嘅衝動!!
但值得留意,伏片的伏,是相對主觀的
因為涉及觀眾入場前的觀影預期,始終人人唔同
例如【雷神3】有人話伏,點解變左笑片?
但我由第一集開始,已經覺得【雷神】系列一直都係笑片
有人expect睇戲娛樂就得,爛片當笑片睇亦可
強如【天機:富春山居圖】,都只係爛,唔可以話伏
因此,爛係可以用電影的普世價值及約定俗成的評審標準去評
伏,則人人入場前有唔同預期,好難一概而論

以下係我個人2017年心目中的伏片
(以電影正式上映日在2017年1月1日至12月31日內計算,優先場不計)
(華語片及外語片合併計算)

2017 十大伏片

第10位:【獵殺星期一】
相信好多人會插我
不過我連【黑豹】都夠膽出文插,呢套難道我會淆底咩?!
事先聲明,我唔覺得呢套係爛片
雖然肯定唔係佳作,緊緊合格果隻啦
但我對套戲可塑性及批判性極高的背景設定
未來一孩政策的極端制度下,衍生出咩社會問題?
七人共用一個身份,會發展出咩曲折情節?
有好大期望入場,我expect係有深度的科幻劇情片
點知套戲乜都冇深入講,反而變左一般腦殘動作片
一人分演七角,原來純粹為左鋪排逐個被殺
七姊妹感情都未建立,大個之後就只有你追我逃
犧牲位矛盾位心理鬥爭位一片模糊
難得搵來多位實力派演員演出
龍紋身女孩 Noomi Rapace、綠魔 Willem Dafoe、101斑點狗 Glenn Close
三個實力派演員根本冇乜同場演繹,仲點會有火花?有戲味?
白白晒左實力派演員的演出
加上劇情粗糙白痴兼有bug
就算以動作片黎評,幾場動作戲都拍得了無張力
導演Tommy Wirkola肯定最大責任
眼高手低,有可塑性和可抽性咁高嘅題材都唔識拍
有好演員都唔識拍,有好材料都唔識炒
整體黎講套戲雖然唔算爛,但肯定係伏!

第9位:【瑪麗與魔女之花】
可以理解為宮崎駿作品的拼貼大匯
好可惜只具其形,冇靈魂!冇個性!
場面熟口熟面,設定似曾相識
大橋又正路到盡,老掉牙的少女成長
總之樣樣炒埋一碟,冇調味,亦冇炒功
睇完只會覺得係
一個好想扮宮崎駿的人去拍偽宮崎駿作品
我自己就睇到好心酸
一個創作人/製作人,窮一生所追求
原來只係跟隨別人的影子,複製別人的copy cat
導演米林宏昌,最多只係宮崎駿槍手或代筆的程度
其實好悲涼

第8位:【明月幾時有】
節奏慢就一定慢,預左以文藝片嘅角度去看
但文藝片貴乎細膩、觸動、以情推動
呢套肯定唔合格,亦係許鞍華做得最差嘅一套
每個角色都好虛好平,冇咩描述
劇情鬆散、故事斷裂、節奏散漫、結局及立場不清不楚
電影強調真人真事改篇
真正找來數位當年嘅遊擊隊成員
許鞍華更加粉墨登場以採訪形式開展故事
但偏偏搵梁家輝飾演其中一位被訪者
令本身想投入去相信係真事嘅觀眾
望住做緊戲嘅梁家輝(雖然好好戲)又醒左
明白一切只係戲一場,感覺好撞!
套戲雖然有主線不過冇主題
你話歌頌緊當時嘅遊擊隊又唔覺
描述日軍當年惡行又沒有
拍一個戰爭下嘅愛情故事又唔似
最多知道三年零八個月期間,香港人係點擺酒結婚囉
如果我唔知道套戲係許鞍華拍,我肯定評為唔會合格
到我知道了,一樣覺得唔合格囉
對比許鞍華以往顛峰作品,唯一實現到香港電影金像獎大滿貫的
(即同時囊括最佳電影、最佳導演、最佳編劇、最佳男主角、最佳女主角)
史上只有【女人四十】和【桃姐】,呢套完全係學生作品

第7位:【拆彈專家】
我無意扼殺製作團隊的一番心血
論特技論場面呢套係有heart做
不過套戲犯左好結構性嘅方向錯誤
以拆彈專家的角度切入,整體拍法係走寫實兼人性化路線
但偏偏劇本原來係寫緊個人英雄片
係好刻意講一個捨身成仁嘅英雄
而唔係講一個現實生活中的拆彈專家
拍法係寫實,但劇本係超現實
撞出黎嘅感覺就係,認真地去拍柒野!!
(類似情況就係【沖天火】和【驚心破】,兩套都係上年我評為十大爛片之一)

你一早話俾觀眾聽其實係拆彈版占士邦
或者Mission Impossible式特務玩型耍帥
可能觀眾會冇咁抗拒
你玩寫實,煞有介事咁鋪排一切
我越認真看,越發現情節上嘅馬虎、細節位嘅粗糙、橋段上嘅唔合理,包括:
1. 點解拆彈專家需要做臥底?!
2. 點解所有炸彈都有個ipad咁大嘅計時器顯示俾所有人知幾時會爆?!
3. 我知三分鐘夠時間灣仔政府合署車去海傍,但冇奶油咩都未檢查就咁攞起,如果炸彈有水平儀或震動sensor咁點算?!乜一攞就爆囉?!
4. 紅隧單野咁大件事,點解連處長及保安局局長都冇份參與?!(修哥只係高級助理處長)
5. 你吹到逼政府回購西隧咁大,點解連立法會或特首一個shot交代下立場都冇?
6. 故事有提到有條維修通道,點解冇警察潛入去?
7. 點解全香港只有劉德華一個拆彈專家?!照計你負責緊紅隧單野,油站有的士懷疑有炸彈又要你親自去拆?!
8. 點解脅持紅隧西隧股價就會升?!政府冇可能會就範掛?!
9. 智叔點解唔沽恆指要升自己隻股咁聰明?!動機明顯到不如直接認左去把啦
10. 點解要安排三個桿匪入左去又出返黎?佢地萬一出唔到,咁揾邊個挾條女?邊個揸直升機?
11. 點解帶細佬黎現場又關拆彈專家事?
12. 炸彈狂徒足足超過四十人,我諗要私人飛機先載到咁多人,直升機只有兩架,佢地原本條橋打算點走?
13. 三日警方除左係度等,究竟有部署過咩?
14. 點解香港果邊冇拆彈專家standby嘅?!
15. 拆彈專家會綁全身炸彈九衝入去講數,呢條橋我諗起到已經面紅,莫講話拍出黎
16. 全場最引觀眾爆粗位:
點解所有炸彈永遠設計黎俾人拆?!
車底個炸彈其實你將標板反轉向入面裝佢地已經唔夠時間拆啦
而且邊有炸彈突出兩條電線俾人剪咁精密?!
點解一定係二揀一?!唔俾剪乜都爆咩?!
劇情上嘅狗屁不通,已經唔係腦殘
直頭當觀眾白痴!

就算唔用腦去challenge劇情
故事本身只刻劃及聚焦劉德華一人
變左所有其他演員都只係陪襯
華仔一人show唔係唔好
但放係呢個故事就自然衍生以上派膠問題
令劇本更加唔合情理
其實套戲叫拆彈專家,冇觀眾expect入去係睇槍戰
本身已經係一廂情願
而套戲第二個嚴重問題
係好認真拍拆彈嘅過程,但冇晒拆彈應有嘅步驟
去到真係拆果下又非常兒戲
噴一噴,剪一剪,拆唔到就走先
真心睇拆彈嘅相當失望
而且拆嘅過程永遠只有一hit
冇扭橋又冇陷阱又冇唔同層次嘅裝置
拆完一關又衍生另一關,限時角力鬥智先睇得過癮
但呢套冇
我真心想撐港產片,但敢問點撐得落?!

第6位:【生化危機:終極屍殺 】 ( Resident Evil: The Final Chapter )
套戲未入基地前仲算合格
汽油陣地戰打得幾過癮,總算緊張刺激
但一入基地就完全垃圾
玩夾門、開風扇、鐳射隧道呢D爛橋咁都玩左3個字
上集個黑超佬可以影分身架
今集削到俾閘夾死一槍都冇開過
睇左你15年六套電影去做一套作品
最後要搶支袋係敵人身上嘅試管呢條橋大家有冇反思過其實好on 9 !?
結局唔撚係呀?直抄【Robocop】You are fired?!
支野200cc都未必有,就咁丟落地可以方圓幾百米喪屍一秒KO!?
再誇嘅係原來就咁可以傳播到全世界!?
究竟編劇係白癡,定編劇當觀眾白癡?!
腦殘到一個臨介點:屌你!完能得未呀仆街!!

********** 發文字數有限,以下回帖再續 **********

Facebook個人專頁:【港產不打】
http://www.facebook.com/fanpage.cheungsecond
(支持我既請like我fanpage,些些!)
**************************
港產不打
要救香港電影,首先票價要減!
**************************
影評歡迎收聽:最長壽科幻主題網台節目【Sci-Fi全面睇】
(逢星期一更新於網台「Ragazine」及「香港花生」)
聽眾歡迎加入FB group【Sci-Fi全面睇】
https://www.facebook.com/groups/339261276632/
同你報導科幻類型作品、電影、玩具、動漫、商品有關情報
2017真打十伏.jpg

港產不打
全職非牟利網絡打手
100%支持本地製作
乜戲都打,淨係唔打港產
回覆

使用道具 舉報

218

主題

0

好友

1299

積分

金牌會員

Rank: 6Rank: 6

發表於 2018-2-24 18:57:38 |顯示全部樓層
第5位:【追捕】
好難看!好認真拍!但效果好柒!
認真拍柒事呢下真係好難撐
或許吳宇森已經冇左團火
自己拍都拍唔返自己當年的風格及水準
其實呢套本質已經完全唔同神作【英雄本色】【喋血雙雄】【喋血街頭】
呢三套嘅神,唔係因為招牌槍戰,而係批判、控訴、掙扎嘅鮮明刻劃
反之呢套角色刻劃模糊
張涵予你覺得邊忽似律師?!
女殺手動情位係邊?人妻矛盾位係邊?
福山雅治我行我素有掙扎位咩?!
我明原著小說係西村壽行《涉過憤怒的河》,1974年作品
同名日本電影【追捕】係1976年作品
你致敬還致敬,都要執執個劇本
殺人、嫁禍、企業陰謀,八個字咁淺,講完
呢個年頭仲話有藥廠研發軍事新藥去強化體能控制心智
老土到爆裂!
整體劇情好粗糙,冇一樣野講得合情合理
情感推演好跳躍,冇一個角色令觀眾順服
反派角色兩父子又接近白癡
計謀白癡、應變又白癡、賣藥條橋都白癡
所謂真相揭盅,全部壞人自己講出口、衝出黎認
冇扭橋,冇佈局,冇鋪排,冇營造,直講直演
劇情仲弱智過超級英雄電影,睇到慘不忍睹!
好!當一般腦殘槍戰娛樂片睇就算
只可惜呢套【追捕】連基本槍戰片要求都做唔到
起碼好多動作場口唔連貫
打打下角色會瞬間轉移
三次追捕,上山下海飛車飛船
冇一次拍得緊張刺激
一槍一件太easy,成噸屍體又點呢?
觀眾睇槍戰唔係睇點開槍,而係想睇張力
【辣手神探】都要有個單眼佬
你都冇塑造一個旗鼓相當的反派角色
打來打去,都係打緊抵抗力,有咩好睇?
除左中日合拍,同埋多左打白鴿
坦白講,同【天機:富春山居圖】有咩分別?

第4位:【變形金剛:終極戰士】( Transformers: The Last Knight )
爛就爛硬,第4集已經俾觀眾插爆
但起碼仲有一定娛樂性,大場面
我就唔係好介意太平山後邊變左桂林
坦白講全世界只有香港人先會知道
拍戲一樓都唔係實景步移架啦
咁點解呢套係伏而唔係爛?
因為佢連以往基本娛樂性都冇埋
我降低到只求娛樂只為消磨兩粒鐘咁低微嘅要求
都會中伏!

成套劇情胡扯到亞瑟王,拍俾英國佬自high,我可以忍
孤兒女加藍色果隻冇變過形嘅綿羊仔出黎為左純粹賣玩具,我可以忍
美國人用酷狗音樂聽歌的,我可以忍
Hot Rod係有出,但變左大黃蜂2.0,我可以忍
Unicorn星帝係有出.......但得6隻角,我可以忍
第五集都仲未肯完?!我都可以忍
仲乜9無啦啦有隻三頭龍?又唔係恐龍派
12條友合體而成好撚大隻但打左唔夠10秒
成套戲兩個半鐘,實情打左加埋唔夠20分鐘
而且每次Battle都係接近秒殺,完能全到喉唔到肺,打得好能醃悶!
文戲又實在好撚多,情節又係搵嘢搵嘢再搵嘢,好撚拖!
連基本大場面都冇,淨係星球chromakey假景
同上集反地心吸力大鬧會展門常開,慳皮到暈
Ending仲難撚晒譜一矛KO
已經可以判左套戲死刑

第3位:【盜墓迷城】( The Mummy )
所謂Dark Universe
其實係將以往經典妖魔鬼怪炒埋一碟reboot
包括呢集嘅木乃伊、雙重人格嘅Dr Jekyll and Hyde
未來話會開嘅仲有【科學怪人的新娘】【狼人】【狙魔人】
甚至乎將【歌聲魅影】【鐘樓駝俠】都入埋
講到尾即係舊料翻叮再Marvel 化
其實冇橋,亦冇新招數
成套戲明顯只係為左交代湯佬成魔經過
平凡人→遇上某人某物→逼不得已接受→獲得非凡力量反敗為勝
根本係超級英雄電影嘅套路同骨幹
唔同嘅只係佢冇特定服飾
同埋佢冇個易叫易明嘅朵囉
牌面係【盜墓迷城】Reboot
但無論劇情、角色、風格、核心價值都完全唔同
已經唔再係一套盜墓片,而係打怪片
當然打得緊張刺激觀眾或許收貨
但呢套打得其實好鬆散
D喪屍甩頭甩骨紙咁化學
女巫係有法力
對人類時實力太懸殊,相當冇趣
到湯佬入魔後又秒殺KO,相當冇癮
最好看只係頭場墜機
但已經係預告片睇晒
最關鍵嘅匕首
可以係自己揸住嘅狀態下俾人偷走
紅寶石都可以徒手敲裂
大家就知劇情腦殘到咩野程度
要湯佬做賤男,始終格格不入
年屆55仲要佢打有D力不從心
成套戲又硬加好多無能謂謂嘅笑位
攪到氣氛和節奏都好撞,錯撚晒!

第2位:【詭娃安娜貝爾:造孽】( Annabelle: Creation )
有睇開我影評都知
我對James Wan只認同【Saw】系列,而且只限於頭3集
之後對佢所謂驚慄宇宙,我從來冇正評過
【兒凶】三集我都插到反轉
【詭屋驚凶實錄】相對好少少,個別驚嚇位有heart做
但整體都係僅僅合格
上一集【詭娃安娜貝爾】我俾15分,100分滿分喎
主要原因係我好能討厭佢將D鬼魂邪靈的恩怨情仇講完又講
其實呢類鬼故D前因後果你想點寫都得,前世今生過去未來
坦白講Who fuxking cares?!

好似今集咁,屌佢見隻詭娃紅左,又拍佢誕生經過
真係好能醃悶!
不過最大鑊都係驚嚇位嘅設計,竟然可以hea到咁
求其前清後朦有野動,近鏡突然彈野出黎呢類低手橋段
最墮落係要用到突然好大聲嘅音效鑑粗嚇觀眾
好差,好低莊
加上第一個驚嚇位足足半個鐘先出現
情節其實又唔係複雜,拖咁耐冇意思囉
而且呢套戲係少有驚呼聲和嘲笑聲接近一比一梅花間竹出現
唔少驚嚇位其實係笑位
又笑又叫,某程度上係雙重享受
好能有層次
今集出左隻稻草人怪其實可塑性高有得做
不過唔知點解冇乜實際作惡又冇俾人收皮嘅情況下收左皮
落到地牢又無啦啦多左隻趴地行屍,不過只係出左5秒又收左皮
Anyway 今集導演咁9求其,David F. Sandberg都可以收皮

第1位:【月亮喜歡藍】( Moonlight )
英文名叫Moonlight,名符其實「悶night」
真係好悶!完全究極催眠!!
節奏仲慢過侯孝賢
童年、少年、成年三段式拍法六人分演兩角
基本上只係寫人寫情,完全冇劇情
冇起承轉合!亦冇高潮起伏!!
情感推演內歛含蓄
節奏平淡情節平凡
聚焦只係男主角的性向
由啟蒙到接受到逃避
反而佢嘅成長處理得非常跳躍
某程度上校園欺淩和老母吸毒都只係配菜
主菜只係ending果場茶記事隔二十年的試探
有人話好有味道,但我就覺得淡而無味

導演Barry Jenkins只有37歲
一直非常推崇王家衞導演
你係youtube打「moonlight wong kar-wai」
有高手將Moonlight和王家衞多套作品比較
好多鏡頭和場景調度都充滿王大導影子
而且佢用返王大導嘅配樂
不過我就係有咁嘅前設下入場,就相當失望
具其形卻虛其本,整體風格和味道完全唔同
或許冇左神攝杜可風玩色調色溫嘅氣氛營造
或許冇左王大導言外有意嘅對白
又或許因為角色變曬黒人味道自然也有所改變
Anyway 呢套電影絶對係文藝片中嘅異色作品
要有一定文藝片修養及相當夠瞓先好入場
P.S. 你問我如果導演用相同手法拍一對白人正常男女情侶
肯定唔會有咁高評價,所以佢攞最佳電影
係贏在議題,唔係技術
P.S. 《La La Land》成功將歌舞片活化
更推廣到年青一代以至全世界
有佢對業界嘅貢獻和歷史意義
攞唔到最佳電影,只因為政治上嘅考量
因為今屆金像獎明顯一定要做到黒白平衡

Facebook個人專頁:【港產不打】
http://www.facebook.com/fanpage.cheungsecond
(支持我既請like我fanpage,些些!)
**************************
港產不打
要救香港電影,首先票價要減!
**************************
影評歡迎收聽:最長壽科幻主題網台節目【Sci-Fi全面睇】
(逢星期一更新於網台「Ragazine」及「香港花生」)
聽眾歡迎加入FB group【Sci-Fi全面睇】
https://www.facebook.com/groups/339261276632/
同你報導科幻類型作品、電影、玩具、動漫、商品有關情報
港產不打
全職非牟利網絡打手
100%支持本地製作
乜戲都打,淨係唔打港產
回覆

使用道具 舉報

42

主題

0

好友

1萬

積分

論壇元老

Rank: 8Rank: 8

發表於 2018-3-12 15:56:12 |顯示全部樓層
雷神唔算伏, 因為第三集已表明會改STYLE, 頭兩集太過似童話, 無乜起伏位,
第二集比第一集更悶, 所以第三集再唔改就瓜得

所以MARVEL大膽將風格完全改變, 不過我就唔多慣雷神搞笑, 因為佢唔似呢類演員
-------------------
盜墓無乜興趣, 一來REBOOT成功電影, 無一套好下場, 二來老湯太殘, MI4, 5都唔想睇佢,
咁老仲要拍動作片, 真係辛苦
-------------------
至於明月幾時有, 無興趣睇, 許鞍華拍合拍片, 想拍啲歷史題材, 但佢唔擅長呢類作品,
搞到無不感人
-------------------
至於月亮喜歡藍攞奧斯卡, 學樓主講, 係政治需要多於藝術成就,
所以今年奧斯卡少左人睇


回覆

使用道具 舉報

您需要登錄後才可以回帖 登錄 | 立即註冊

回頂部